Жаңалықтар

2025 жылдың наурыз-мамыр айлары аралығында Экономика жоғары мектебінің Жасыл экономика мектебінің басшылары Лесбаева Г. Т. мен Байбаш Г. Қ. жасыл экономика, тұрақты даму және климаттық трансформация мәселелеріне арналған біліктілікті арттыру бағдарламасын сәтті аяқтады.

Курстық бағдарлама тұрақты дамуға көшу барысындағы заманауи сын-қатерлер мен басымдықтарды қамтыған кең ауқымды тақырыптарды қамтыды: жасанды интеллект дәуіріндегі білім беру мен еңбек нарығының болашағы; БҰҰ-ның климаттық режимінің тарихы және жаңа климаттық экономика; жасыл трансформациядағы сыбайлас жемқорлыққа қарсы мәдениет және құқықтық негіздер; энергетикалық сектор мен экологиялық туризмнің әлеуметтік-экономикалық дамудағы рөлі; тұлғаның экологиялық мәдениетін қалыптастыру, эмоционалдық интеллект пен эмпатияны дамыту; жасыл экономика саласындағы ұлттық заңнама және халықаралық тәжірибе.

Бағдарламаның ерекше құндылығы – климаттық парадигманың жаңа моделін, көміртегі бейтараптығына қол жеткізу стратегияларын және әрбір адамның (L.O.V. – жеке анықталған үлес) тұрақты болашаққа қосатын үлесін ашып көрсеткен, Нобель сыйлығының лауреаты, халықаралық сарапшы Рае Квон Чунгтың дәрістері мен семинарлары болды.

Курсты аяқтау нәтижесінде қатысушылар жеке тапсырмаларды орындап, қорытынды пікірталасқа қатысты. Бұл курс кәсіби біліктілікті арттырудағы маңызды қадам болып табылады және Жоғары экономика мектебінің жасыл экономика мен тұрақты даму саласындағы ғылыми-білім беру әлеуетін нығайтуға өз үлесін қосады.

🎓 AIU-да қонақтар дәрісі🌍

2 маусымда біздің университетте ерекше қонақ болды — Joel Adamson (Жолтай) — кәсіпкер, инвестор, халықаралық тәжірибесі бар инженер-эколог! 🇺🇸🤝🇰🇿 

Ол бөлісті:

✨ Тұрақтылық туралы түсініктер

🌱 Мұнай саласындағы жұмыс тәжірибесімен

🌍 Жаһандық бизнестегі қазақ мәдениетінің маңыздылығы

Ең бастысы-студенттерімізді болашаққа белсенді және жауапты болуға шабыттандырды!

En Joel-investsheshim президенті және Instagram-да танымал блогер (@Joel.investkaz), Қазақстанды әлемдік аренада белсенді түрде ілгерілетуде 🌐

Айта кету керек, қонақтар дәрісі қазақ тілінде өткізілді, Адамсон мырза қазақ тілін жетік біледі және шет тілдерін үйренудің құпияларымен бөлісті. 

Сапарыңыз бен мотивацияңыз үшін рахмет! Жаңа кездесулер мен жобаларды күтеміз 💼

#AIU #JoelAdamson #қонақтар кеші

2025 жылғы 2 маусымда Финляндияның Kajaani қолданбалы ғылымдар университетінің (KAMK) өкілдері Astana International University (AIU) университетіне ресми сапармен келді. Кездесу екі жоғары оқу орны арасындағы серіктестікті нығайтудың маңызды кезеңіне айналып, білім беру мен ғылыми-зерттеу бағыттарында жаңа мүмкіндіктерге жол ашты.

Кездесу барысында тараптар ақпараттық технологиялар, бизнес және экономика, туризм мен экология салаларындағы ынтымақтастық мәселелерін талқылады. Бірлескен білім беру бағдарламаларын іске қосу, академиялық ұтқырлықты дамыту, тағылымдамалар мен жобалық оқыту форматтарын енгізу – басты назарда болды.

AIU халықаралықтандыру, әлемдік рейтингтерге қатысу және Еуропа, Азия мен АҚШ университеттерімен әріптестік орнату саласындағы жетістіктерімен бөлісті. Өз кезегінде, фин тарапы тәжірибеге бағытталған жобаларды – бірлескен модульдер, пәнаралық шеберлік сабақтары және онлайн-бағдарламаларды жүзеге асыруға дайын екенін білдірді.

Kajaani қолданбалы ғылымдар университеті (KAMK) – Финляндияның орталығында орналасқан халықаралық деңгейдегі қолданбалы жоғары оқу орны. 1992 жылы құрылған университет аймақтық және ұлттық деңгейде инновацияларға бағытталған білім беру үлгісімен танымал. Бүгінде KAMK-де шамамен 3300 студент білім алады, ал түлектерінің саны 5500-ден асады.

KAMK келесі білім беру бағдарламаларын ұсынады:

• Фин тілінде – 10 бакалавриат бағдарламасы, ағылшын тілінде – 4 бакалавриат бағдарламасы;

• Фин тілінде – 7 магистратура бағдарламасы, ағылшын тілінде – 2 магистратура бағдарламасы.

KAMK Финляндияда оқыту мен академиялық қолдаудың сапасы бойынша бірнеше жыл қатарынан үздік атанып келеді. FINEEC – Финляндияның Білім беру сапасын бағалау орталығы университетке 2027 жылдың көктеміне дейін жарамды сапа белгісін берген.

Университеттің KAMK’30 стратегиясы білім беру қызметтерін ұсынатын қауіпсіз, тартымды және денсаулыққа қолайлы орта қалыптастыру, қоғам сұранысына сай нәтижеге бағытталған оқыту жүйесін қамтамасыз ету және таңдаулы академиялық салаларда ұлттық әрі халықаралық серіктеске айналу мақсатын көздейді.

Кездесу соңында тараптар келесі бағыттарды қамтитын өзара түсіністік туралы меморандумды дайындауға уағдаласты:

• Бірлескен білім беру бағдарламаларын іске асыру;

• Студенттер, оқытушылар мен зерттеушілер алмасуы;

• Бірлескен ғылыми және тәжірибелік іс-шаралар өткізу;

• Оқу-әдістемелік материалдар мен ғылыми жарияланымдармен алмасу;

• Кәсіби даму және біліктілікті арттыру бағдарламаларын ұйымдастыру.

AIU мен KAMK өкілдері бұл серіктестік – білім, тәжірибе және инновациялық көзқарастармен алмасу арқылы екі елдің де жас мамандарын сапалы даярлауға үлес қосатын нақты қадам болады деген сенім білдірді.

Astana International University (AIU) оқу орнына ресми сапармен Ифе королі әрі йоруба халқының рухани көсемі – Оның Ұлылығы Адеейе Энитан Огунвуси келді. Йоруба – Нигериядағы ең ірі этностардың бірі, халқының саны шамамен 40 миллион адамға жетеді.

Бұл сапар корольдің «Астана» халықаралық форумына қатысуы аясында жүзеге асты. Ол форум тарихында алғаш рет өткен «Қазақстан – Африка: ынтымақтастықтың жаңа көкжиектері» атты арнайы сессияда спикер ретінде сөз сөйледі.

AIU қабырғасында өткен ресми кездесу барысында мәртебелі мейман Нигерияның бүгінде Африканың халқы ең көп әрі қарқынды дамып келе жатқан елі екенін атап өтті. Бүгінде ел халқы 235 миллионнан асады, ал халықтың медиандық жасы – небәрі 18,1 жас. Бұл көрсеткіш Нигерияны әлемдегі ең жас мемлекеттердің біріне айналдырады. Сол себепті ел алдында білім беру саласында кешенді шешімдер қабылдау міндеті тұр. Нигерия үкіметі өз жастарына сапалы білім беру мақсатында халықаралық серіктестермен тығыз байланыс орнатуға мүдделі. Әсіресе академиялық ұтқырлық бағдарламаларын іске қосу, қос диплом беру жобаларын дамыту және тілдік даярлықты кеңейту мәселелері басым бағыттар қатарында.

Осы тұрғыда корольдің AIU-ға сапары нақты әріптестік механизмдерін талқылап, университет пен Нигерия тараптары арасында өзара келісімдер жасауға жол ашты.

Кездесу барысында AIU президенті университеттің құрылу тарихы, профессорлық-оқытушылық құрамы, халықаралық бағдарламалар мен жетістіктері туралы кеңінен баяндады. Әсіресе университеттегі интернационалдандыру саясаты мен көптілді білім беру тәжірибесіне ерекше тоқталды. Ректордың айтуынша, шетелдік студенттер қазақ, ағылшын, орыс және қытай тілдерін дәстүрлі әдістермен де, заманауи цифрлық құралдар арқылы да еркін меңгере алады.

Бүгінде AIU 12 елдің студенттерін біріктіріп отыр. Ал Нигериямен жасалатын алғашқы келісімдер осы ел жастары үшін университеттің жаһандық академиялық қауымдастығына қосылудың бастауы болмақ.

«Білім – мәдениеттер мен құрлықтарды жалғайтын алтын көпір. Оның Ұлылығы Адеейе Энитан Огунвусидің университетімізге арнайы келуі – өзара құрмет пен сенімнің белгісі. Бұл кездесу жоғары білім саласындағы тығыз ынтымақтастықтың жаңа кезеңін бастайды деп сенеміз», – деді Astana International University ректоры.

Astana International University халықаралық ынтымақтастық аясын кеңейтуін жалғастыруда. 2025 жылғы 6 мамырда университетке Испания Корольдігінің Қазақстан Республикасындағы Елшілігінің өкілдері жұмыс сапарымен келді: Миссия басшысының орынбасары Беатрис Муньос Гонсалес (Beatriz Muñoz González), кеңесші Хосе Аурелио Льянеcа (José Aurelio Llaneza) және көмекші Альберт Витриа (Albert Vitriá).

Кездесу барысында тараптар AIU мен Испания университеттері арасындағы академиялық әріптестік мүмкіндіктерін талқылады. Беатрис Муньос испан тарапынан қазақстандық жоғары оқу орындарымен ынтымақтастыққа деген қызығушылықтың артып келе жатқанын атап өтіп, университет испан тілі бағдарламаларын дамытуға толық әлеуетке ие екенін жеткізді.

Елшілік кеңесшісі Хосе Аурелио Льянеcа AIU бастамаларына қолдау көрсетуге дайын екенін білдірді. Ол білім беру платформалары арқылы өзара әрекеттесу мүмкіндіктері туралы айтып, университетке ынтымақтастық бағыттары бойынша нақты ұсыныстар жіберуді ұсынды — бұл ең қолайлы испан серіктес жоғары оқу орындарын таңдауға мүмкіндік береді.

Талқылау аясында академиялық алмасу бағдарламаларынан бастап, экология, халықаралық қатынастар, IT, дизайн, педагогика және инклюзивті білім беру салаларындағы бірлескен ғылыми жобаларға дейінгі тақырыптар қамтылды. Сондай-ақ, Horizon Europe сияқты еуропалық ғылыми гранттық бағдарламаларға қатысу мүмкіндіктері сөз болды.

Қонақтар испан тілінің әлемдегі маңыздылығы мен жастар арасында танымал болып келе жатқанын ерекше атап өтті және AIU-пен ынтымақтастық екі ел арасындағы тиімді диалогтың жарқын үлгісіне айналатынына сенім білдірді.

AIU Испания Елшілігіне көрсеткен қызығушылығы мен сапары үшін алғыс білдіреді және халықаралық әріптестіктің жаңа мүмкіндіктеріне ашық болашаққа үмітпен қарайды.

2025 жылғы 24 сәуірде Astana International University қабырғасында Қытай қоғамдық ғылымдар академиясының Ресей, Шығыс Еуропа және Орталық Азия институтының делегациясымен кездесу өтті. Кездесу ғылым және білім саласындағы ынтымақтастықты дамытуға арналған академиялық пікір алмасу форматында өтті.

AIU атынан кездесуге университеттің вице-президенті Қайрат Абдрахманов, экономика ғылымдарының докторы, профессор Мейрам Қажыкен, Азия–Еуропа бағытындағы Жаңа құрлықтық-көліктік дәліз бойынша ғылыми-зерттеу институтының қазақстандық филиалының директоры Нұрәлі Ирсалиев және ғылыми қызметкер Берік Табынбаев қатысты.

Қытай делегациясы құрамында Институт директорының орынбасары Цзинь Чжэ, көпжақты және аймақтық ынтымақтастық бөлімі меңгерушісі Ли Юнхуэй, Ресей экономикасы бөлімі меңгерушісінің орынбасары Гао Цзисян, сондай-ақ жетекші ғылыми қызметкерлер Цзян Цзин және Чжао Юймин болды.

Кездесу барысында ғылыми жобалар, академиялық алмасулар және бірлескен бастамалар талқыланды. Сондай-ақ ОПОП және Транскаспий бағыты сияқты халықаралық көлік дәліздерін дамыту, цифрландыру, мәдени-гуманитарлық байланыстар және ШЫҰ, АӨСШК, БРИКС секілді ұйымдар аясындағы ынтымақтастық мәселелері көтерілді.

Орталық Азияның маңызы ерекше аталып өтті. «Орталық Азия — жолдар торабында орналасқан, бұл өңірге үлкен жауапкершілік жүктейді» деген пікір айтылды. Ынтымақтастық сенім мен біртіндеп жақындасуға негізделуі тиіс. «Қадам-қадаммен жақындасу — үлкен жолдың бастамасы» деген ой да ортаға салынды.

Мәдениет пен білім беру — тұрақты әріптестіктің негізі ретінде ерекше атап өтілді.

AIU мұндай кездесулерді тәжірибе алмасу, жаңа байланыстар орнату және ғылым мен білім саласындағы бірлескен жобаларды жүзеге асырудың маңызды алаңы ретінде қарастырады.

2025 жылғы 20 сәуірде, Халықаралық қытай тілі күніне орай, Астанада Орталық Азиядағы қытай тілі мұғалімдерінің оқыту құзыреттілігін арттыру тақырыбында ауқымды семинар өтті. Шараны Қытай Халық Республикасының Қазақстандағы Елшілігі бастамашы етсе, ұйымдастырушы ретінде Бейжің тілі және мәдениеті университетінің Қазақстандағы филиалы болды.

Семинардың ашылуында ҚХР-дың Қазақстандағы Төтенше және Өкілетті Елшісі Хань Чуньлинь, Астана халықаралық университетінің президенті Серік Азтаевич Ирсалиев және Л.Н. Гумилев атындағы Еуразия ұлттық университетінің белгілі қытайтанушы профессоры Клара Шайсултанқызы Хафизова сөз сөйледі. Іс-шараға Бейжің тілі және мәдениеті университетінің ректоры Дуань Пэн бейнеүндеу жолдады.

Елші Хань Чуньлинь қазақтың «Тіл – адамның жанының кілті» деген мақалын келтіріп, қытай тілінің мыңжылдық өркениеттің даналығын әлемге жеткізетінін атап өтті. Ол қытай жазуының бірегейлігін, атап айтқанда «жэнь» (гуманизм) және «дао» (жол) иероглифтерін, сондай-ақ Қытай ғылымы мен мәдениетінің жетістіктерін тілге тиек етіп, Қазақстанда қытай тілін оқытуды «алтын мүмкіндік» деп атады.

Астана халықаралық университетінің президенті Серік Азтаевич Ирсалиев семинардың маңыздылығына тоқталып, оны тәжірибе алмасу, кәсіби қауымдастық құру және екі елдің білім беру мекемелері арасындағы ынтымақтастықты кеңейту алаңы ретінде бағалады.

Өз бейнеүндеуінде Бейжің тілі және мәдениеті университетінің ректоры Дуань Пэн Қазақстандағы филиалды Қытай мен Қазақстан арасындағы гуманитарлық алмасудың «маржаны» деп атап, оның ерекше миссия атқаратынын жеткізді. Ол семинардың аймақта қытай тілін дамытуда тірек нүктесіне айналатынына үміт білдірді.

Профессор Клара Шайсултанқызы Хафизова өз сөзінде қытай иероглифтерінің көркемдігін, тондардың маңызын және қытай тілінің өңір халықтарының этномәдени тарихымен байланысын ашып көрсетті.

Бейжің тілі және мәдениеті университеті, Л.Н. Гумилев атындағы ЕҰУ, Назарбаев Университеті және басқа мекемелердің сарапшылары баяндама жасады. Қазақстан, Өзбекстан, Тәжікстан және Қытайдан келген 100-ге жуық қатысушы белсенді түрде пікірталасқа қатысты.

Семинарға қатысқан сарапшылар мен педагогтер іс-шараның табысты өткенін бірауыздан атап өтті: жаңа білім алынды, тәжірибе алмасылды, өзекті мәселелер талқыланды, Қазақстандағы қытай тілі оқытудың жай-күйі тереңірек түсінілді. Глобалдық өзгерістер аясында қытай тілінің болашағы, иероглифтерді оқытудағы халықаралық стандарттардың рөлі, «теория аз – практика көп» тәсілінің тиімділігі, халықаралық оқытуда Deepseek технологиясын қолдану теориясы мен әдістемесі, сондай-ақ бастауыш кезеңге арналған мәдени оқулықтарды құрастыру бағытындағы жаңа талпыныстар сөз болды. Семинардан кейін пікір алмасу жалғасып, қатысушылар идеяларымен бөлісіп, Қазақстанда қытай тілін оқытуды нығайту мен дамытуға өз үлесін қосуға дайын екендерін білдірді.

2025 жылғы 4–5 сәуір аралығында AIU Самарқанд қаласындағы SOF EXPO көрме орталығында өткен WORLD EDU 2025 халықаралық білім көрмесіне қатысты. Бұл – өңірдегі ең ірі білім беру іс-шараларының бірі, ол Өзбекстаннан, Қазақстаннан, Түркиядан, Қытайдан, Ресейден, Беларусьтен, Еуропа мен Оңтүстік-Шығыс Азия елдерінен келген 70-тен астам жетекші жоғары оқу орындарын және білім беру ұйымдарын жинады. Көрмеге мыңдаған талапкерлер, олардың ата-аналары және сала мамандары қатысты.

AIU, сондай-ақ біздің серіктестеріміз – Бейжің шет тілдер университеті (BLCU) және Халықаралық бизнес және экономика университеті (UIBE) көрме барысында білім беру бағдарламаларын, қабылдау шарттарын, академиялық ұтқырлық мүмкіндіктерін және студенттік өмірдің ерекшеліктерін ұсынды. AIU стендіне келушілер бакалавриат, магистратура және докторантура бағдарламаларына, сондай-ақ стипендиялық мүмкіндіктерге ерекше қызығушылық танытты.

Көрменің екінші күні AIU көрменің басты сахнасында таныстырылды. Университет өкілдері оқу орнының артықшылықтары туралы айтып, қонақтардың сұрақтарына жауап беріп, қатысушыларға естелік сыйлықтар табыстады.

Сонымен қатар, AIU командасы басқа университеттердің өкілдерімен бірқатар кездесулер өткізіп, ынтымақтастық пен халықаралық алмасу мүмкіндіктерін талқылады. Жаңа байланыстар екіжақты серіктестікті нығайтып, бірлескен білім беру бастамаларын жүзеге асыруға негіз болатынына сенімдіміз.

WORLD EDU 2025 көрмесіне қатысу AIU-дың халықаралық деңгейде танылуына үлкен қадам болды және студенттердің сапалы білім мен академиялық ұтқырлыққа деген жоғары қызығушылығын көрсетті.

Бүгін, 16 сәуір күні, Astana International University-ге Қазақстан Республикасындағы Израиль Мемлекетінің Төтенше және Өкілетті Елшісі Эдвин Ябо Глусман ресми сапармен келді.

Университет басшылығымен өткен кездесу барысында жоғары білім және ғылым саласындағы ынтымақтастықты дамыту мүмкіндіктері талқыланды. Негізгі назар академиялық алмасу, тағылымдамалар бағдарламалары және бірлескен ғылыми зерттеулер перспективаларына аударылды.

Тараптар экономика және су ресурстары сияқты салалардағы серіктестіктің жоғары әлеуетін атап өтті. Бұл бағыттар Қазақстан үшін де, халықаралық академиялық қауымдастық үшін де өзекті болып табылады. AIU өкілдері Бар-Илан университеті мен Холон технологиялар институтын қоса алғанда, бірқатар израильдік университеттермен тікелей байланыс орнатуға қызығушылық білдірді.

Сондай-ақ студенттер мен оқытушылардың халықаралық білім беру бағдарламаларына қатысу формалары және ғылыми-мәдени алмасу аясында бірлескен іс-шаралар өткізу мүмкіндігі қарастырылды.

Кездесу барысында су ресурстарын тиімді басқару мәселелеріне ерекше назар аударылды. Елші Израильдің су тапшылығы мен табиғи ресурстарды тұрақты пайдалану мәселелерін шешу тәжірибесімен бөлісті. Бұл тәсілдер урбанизация жағдайында су ресурстарын ұтымды бөлу тұрғысынан Қазақстан үшін қызығушылық тудырады.

AIU тұрақты су пайдалану технологияларын дамытуға бағытталған бастамаларға қатысу мүмкіндігін қарастыруда. Осыған байланысты студенттердің зерттеу және тәжірибеге бағытталған жобаларға тартылуы маңызды екенін атап өтті.

Сапар аясында тұрақты даму мен табиғи ресурстарды ұтымды пайдалану идеяларына негізделген экономикалық және философиялық тұжырымдамалар да талқыланды. Бұл тақырыптар болашақ бірлескен академиялық пікірталастардың негізі бола алады.

Тараптар Израиль–Қазақстан ынтымақтастық форумы аясында серіктестікті бастауға уағдаласты. Форум 2025 жылғы 21–23 сәуірде Астана қаласында өтеді. AIU-дың осы іс-шараға қатысуы академиялық және ғылыми әріптестікті дамытудың алғашқы қадамы болмақ.

AIU мырза Эдвин Ябо Глусманға жасаған сапары үшін алғыс білдіреді және диалог пен ынтымақтастықтың одан әрі дамуына үміт артады.

Бүгін, 8 сәуірде, Astana International University-де университет басшылығы мен Жапонияның Қазақстан Республикасындағы Елшілігінің мәдениет, білім, ақпарат және консулдық мәселелер бөлімінің өкілі – екінші хатшы ханым Ёко Сэкигучи арасында мазмұнды кездесу өтті.

Кездесу барысында ынтымақтастықтың нақты бағыттары талқыланды. Ханым Сэкигучи жапон және қазақстандық жоғары оқу орындары арасында серіктестік орнатуға, әсіресе халықаралық байланыстар, жапон тілін оқыту, алмасу бағдарламалары мен ғылыми жобалар саласында қолдау көрсетуге дайын екенін білдірді.

🔹 Талқылау кезінде Жапония университеттері мен AIU арасындағы ықтимал әріптестік мәселелері қозғалды.
🔹 Студенттермен алмасу бағдарламаларына, бірлескен білім беру жобалары мен оқытушылардың тағылымдамаларына ерекше көңіл бөлінді.
🔹 Ханым Сэкигучи жапон студенттерінің орыс тіліне қызығушылығын атап өтіп, AIU-ды ресейлік жоғары оқу орындарына балама ретінде қарастырды.
🔹 Сонымен қатар, жапон мәдениетіне арналған іс-шараларды ұйымдастыру және академиялық байланыстарды кеңейту перспективалары қарастырылды.

AIU Жапонияның алдыңғы қатарлы университеттерімен тікелей байланыс орнатуға мүдделі екенін білдірді. Университет жапон профессорлары мен зерттеушілерін дәрістер мен шеберлік сыныптарын өткізуге шақыру бастамасын ұсынды.

🤝 Студенттердің халықаралық тәжірибе алу мүмкіндіктері артуы маңызды, және мұндай кездесулердің осыған сеп болатынына қуаныштымыз.

2025 жылғы 5 наурызда университетке Венгрияның Қазақстандағы Елшісі Отто Иван Рона келді. Сапар барысында ол университет басшылығымен және студенттермен кездесіп, Stipendium Hungaricum бағдарламасы — Венгрияның жетекші жоғары оқу орындарында білім алуға мүмкіндік беретін қазақстандық студенттерге арналған стипендиялық бастама туралы әңгімеледі.

Stipendium Hungaricum бағдарламасы әртүрлі елдерден, соның ішінде Қазақстаннан келген студенттерге Венгрияның жетекші жоғары оқу орындарында оқуға мүмкіндік беретін стипендиялық бастама болып табылады. Бағдарламаның гранттары оқу ақысын, тұру шығындарын жабады, сонымен қатар медициналық сақтандыруды қамтиды. Бағдарлама бакалавриат, магистратура және PhD бағдарламаларын қамтиды, бұл Еуропада сапалы білім алғысы келетін студенттер үшін кең перспективалар ашады.

Елші Венгрия мен Қазақстан арасындағы білім беру байланыстарының маңыздылығын атап өтіп, Stipendium Hungaricum-ға қатысу екіжақты қатынастарды нығайтуға көмектесетінін атап өтті. Сондай-ақ, Рона мырза білім, экономика және мәдениетті қоса алғанда, түрлі салаларда Қазақстанмен ынтымақтастықты дамытуға баса назар аудара отырып, Венгрияның сыртқы саясаты туралы айтып берді.

Студенттер өтінім беру процесі, оқу шарттары және Венгриядағы өмір туралы сұрақтар қою арқылы бағдарламаға үлкен қызығушылық танытты. Бұған жауап ретінде Елші бағдарламаға қатысқысы келетіндер үшін пайдалы ақпарат бере отырып, толық түсініктеме берді..

Astana International University Отто Иван Рон мырзаға сапары үшін алғыс білдіреді және білім беру саласында Венгриямен ынтымақтастықты одан әрі дамытуға үміттенеді. Қосымша ақпарат алу үшін студенттер университеттің халықаралық ынтымақтастық департаментіне жүгіне алады.

Астана Халықаралық университетінің педагогикалық институтының «6В01503-Химия» білім беру бағдарламасының студенттері жоғары оқу орындарының студенттері арасындағы III Халықаралық химия олимпиадасында жоғары кәсіби дайындық деңгейін және алға қойылған мақсаттарға жетуге деген ұмтылысын көрсетіп, үлкен жетістіктерге қол жеткізді.

Жоғары оқу орындарының студенттері арасындағы III Халықаралық химия олимпиадасына қатысу нәтижесінде команда үш медаль жеңіп алып, шеберлік пен кәсіби құзыреттіліктің жоғары деңгейін көрсетті. Сонымен қатар, студенттеріміз олимпиада аясында ұйымдастырылған Халықаралық ғылыми-тәжірибелік конференцияның үш секциясына белсенді қатысып, жүлделі орындармен марапатталған жалғыз қатысушылар болды.

Ерекше мақтанышпен атап өтетін жайт – біздің командамыз ғылыми химия өкілдерімен тең дәрежеде өнер көрсеткен педагогикалық бағыттағы жалғыз команда болып, сондай-ақ 13 елден келген қатысушылар арасында Қазақстанның жалғыз өкілі болды.

Команда жетекшісі Нұрғалиева Дамен Ауқилқызына студенттерге қолдау көрсеткені үшін, сондай-ақ қатысушыларға – 4-курс студенті Қайыров Нұрлан Мұрадұлына, 1-курс студенттері Қали Асанәлі Манарбекұлына және Акрамов Асланбек Алтынбекұлына, 2-курс студенті Моисеенко Амадей Владимировичке еңбектері, табандылықтары және университетімізді халықаралық аренада лайықты деңгейде танытқаны үшін алғысымызды білдіреміз.

Жеңістеріңізбен және сәтті өнер көрсетулеріңізбен құттықтаймыз! Алдағы уақытта да табыс пен жаңа жетістіктер тілейміз!