Жаңалықтар

Astana International University студенті Бакдаулет Кемал 2025-2026 маусымындағы халықаралық Huawei ICT Competition байқауында III орынға ие болды.

Жеңімпаздың аты-жөні мен нәтижесі салтанатты марапаттау рәсімі барысында ресми түрде жарияланды. Марапаттау рәсіміне Astana International University вице-президенті Қайрат Амангельдиевич және Ақпараттық технологиялар және инженерия жоғары мектебі деканының орынбасары Мира Жорабековна қатысып, іс-шараның жоғары мәртебесін және байқаудың ІТ-білім беруді дамыту мен бәсекеге қабілетті мамандар даярлаудағы маңызын атап өтті.

Сондай-ақ жеңімпаздарға сертификаттар мен сыйлықтарды Қазақстан Республикасының Ғылым және жоғары білім министрлігінің вице-министрі Шеглова Д.Р. және Huawei компаниясының Қазақстандағы басшылығы табыстады.

Huawei ICT Competition ақпараттық-коммуникациялық технологиялар саласындағы әлемнің ондаған елінен студенттерді біріктіретін ең ірі халықаралық байқаулардың бірі. Бакдаулет Кемалдың жеңісі Astana International University студенттерінің жоғары дайындық деңгейін және университеттің білім беру бағдарламаларының сапасын айқын көрсетеді.

Astana International University (AIU) мен Азиаттық ғылымдар академиясы халықаралық ғылыми зерттеулерді дамыту, академиялық ұтқырлықты кеңейту және бірлескен білім беру бастамаларын іске асыруға бағытталған ынтымақтастық туралы меморандумға қол қойды.

Құжатта бірлескен ғылыми-зерттеу жобаларын жүзеге асыру, ғалымдар мен жас зерттеушілер алмасу, халықаралық конференциялар, семинарлар мен жазғы мектептер ұйымдастыру, сондай-ақ аналитикалық есептер мен сараптамалық ұсынымдар әзірлеу көзделген. Сонымен қатар жарияланымдық белсенділікті арттыруға, бірлескен ғылыми мақалалар мен ұжымдық монографиялар дайындауға ерекше назар аударылады.

Ынтымақтастық аясында пәнаралық зерттеулерді дамытуға және ғылым мен технологиялардың БҰҰ-ның Тұрақты даму мақсаттарына қол жеткізудегі рөліне басымдық беріледі. Бұл - ғылымды тек жаңа білім көзі ретінде ғана емес, жаһандық әлеуметтік-экономикалық және экологиялық мәселелерді шешудің тиімді құралы ретінде қарастыратын қазіргі әлемдік үрдістерге сай келетін бағыттардың бірі.

Меморандумда атап көрсетілгендей, серіктестік академиялық еркіндік, ашық ғылым, өзара құрмет және ерікті қатысу қағидаттарына негізделеді. Нақты жобалар мен оларды іске асыру тетіктері жекелеген келісімдер арқылы рәсімделіп, бұл тараптардың ғылыми басымдықтары мен мүмкіндіктерін икемді түрде ескеруге мүмкіндік береді.

Атап айтқанда, ынтымақтастықтың перспективалы бағыттарының бірі - аумақтық зияткерлік меншік бойынша азиялық жүйе құру. Мұндай жүйе ғылыми әзірлемелер мен өнертабыстарды халықаралық деңгейде қорғауға жол ашады:  патент бірден әлемнің 189 елінде уақытша (үш жылға дейін) құқықтық қорғауды қамтамасыз ете алады, сондай-ақ бір патент Еуропаның 38 елін қамтуы мүмкін. Бұл инженерлерге, зерттеушілер мен әзірлеушілерге ғылыми идеяларды коммерцияландыру және халықаралық деңгейде ілгерілету үшін жаңа мүмкіндіктер ұсынады.

Қазақстан мен Қытай арасындағы достық байланыстарды нығайтуға қосқан елеулі үлесі үшін Пекин тіл және мәдениет университетінің Президенті Дуань Пэн «Достық» орденінің II дәрежесімен марапатталды. Жоғары мемлекеттік награданы Қазақстан Республикасының Қытай Халық Республикасындағы Төтенше және Өкілетті Елшісі Шахрат Нұрышев табыстады.

Марапаттау рәсімі барысында Қазақстанның дипломатиялық миссиясының басшысы аталған орденнің маңыздылығына тоқталып, Пекин тіл және мәдениет университетінің Қазақстан үшін білікті кадрлар даярлау ісіне қосқан үлесін ерекше атап өтті. Айта кету керек, Қазақстан Республикасының Президенті Қасым-Жомарт Тоқаев дәл осы оқу орнында білім алған. Бүгінде университет бұл игі дәстүрді жалғастырып, қазақстандық жастарды Бейжің қаласында да, Астана қаласындағы филиалында да даярлап келеді.

Белгілі болғандай, Пекин тіл және мәдениет университетінің Астанадағы филиалы 2024 жылы екі елдің мемлекет басшыларының қатысуымен Астана халықаралық университетінің базасында салтанатты түрде ашылған болатын. Қазіргі таңда филиалда 250-ге жуық студент білім алуда.

Айта кетейік, «Достық» ордені халықтар арасындағы бейбітшілік, өзара түсіністік пен ынтымақтастықты нығайтуға қосқан ерекше еңбегі үшін табысталады және Қазақстан Республикасының беделді мемлекеттік наградаларының бірі саналады.

18 желтоқсан күні University of International Business and Economics (UIBE, Бейжің қаласы.) шет тілдері институтымен бірлесіп «Халықаралық бизнес» қос дипломды білім беру бағдарламасының 4-курс студенттері мен қытай студенттердің кездесуі ұйымдастырылды.

Кездесу жылы, достық және еркін атмосферада өтті. Іс-шараның негізгі мақсаты - студенттердің ауызша сөйлеу дағдыларын дамытуға және мәдениетаралық қарым-қатынасын нығайтуға ықпал ету.

Кездесу аясында біздің студенттер арнайы викторина дайындап, оның барысында қытай студенттер Қазақстан және Орталық Азияның басқа да елдерінің мәдениетімен танысты, ал «Халықаралық бизнес» қос дипломды білім беру бағдарламасының 4-курс студенттері Қытай мәдениеті туралы көптеген қызықты мәліметтер алды.

Қазіргі таңда екінші серіктес университет - Бейжің қаласындағы University of International Business and Economics (UIBE) базасында білім алып жатқан «Халықаралық бизнес» қос дипломды білім беру бағдарламасының 4-курс студенттері халықаралық деңгейде өздерінің жоғары академиялық және қытай тіліндегі дайындық деңгейін көрсетті.

Қытай Халық Республикасында оқу барысында Ем Сарра, Мурсалимова Жансая және Болат Айтуар атты үш студент UIBE-де шетелдік студенттер арасында өткізілген《圆梦中国》 - Қытайда білім алып жатқан шетелдік студенттерге арналған қытай тіліндегі эссе байқауы

Аталған байқау қытай тілі мен мәдениетін меңгеріп жатқан әртүрлі елдердің студенттерін біріктіріп, қытай тіліндегі академиялық жазылым дағдыларын дамытуға және мәдениетаралық өзара түсіністікті нығайтуға бағытталған.

Байқау қорытындысы бойынша студенттеріміздің эсселері қазылар алқасы тарапынан жоғары бағаланып, байқау жинағында жариялауға лайық деп танылды, бұл - маңызды академиялық жетістік әрі қытай тілін меңгеру деңгейінің жоғары екенін дәлелдейді.

Байқауға қатысқан барлық студенттер UIBE Халықаралық институты тарапынан берілген Құрмет грамоталарымен марапатталды.

Студенттерімізді лайықты жетістіктерімен құттықтай отырып, алдағы оқуында, ғылыми және халықаралық қызметінде табыстар тілейміз.

2025 жылғы 15 желтоқсанда Астана халықаралық университетінде Қазақстан Республикасы Ғылым және жоғары білім министрлігі Ғылым комитетінің Ботаника және фитоинтродукция институтының (Алматы қ.) қызметкерлерінің қатысуымен ғылыми семинар өтті.

Іс-шара АР19679078 «Қазақстанның аридті флорасының реликттік генофондын сақтау мақсатында солтүстік-шығыс Бетпақдаланың экотондық аумағының түрлік әртүрлілігін зерттеу» гранттық жобасын іске асыру аясында ұйымдастырылды. Аталған жоба Қазақстан Республикасы Ғылым және жоғары білім министрлігі Ғылым комитетінің Ботаника және фитоинтродукция институты тарапынан жүзеге асырылуда.

Семинар Жаратылыстану ғылымдарының жоғары мектебінің профессор-оқытушылар құрамы, студенттері, магистранттары мен докторанттары үшін ұйымдастырылып, Қазақстанның аридті аймақтарындағы ботаникалық әртүрлілік, экология және сирек әрі реликтті өсімдік түрлерін сақтау мәселелерін талқылауға арналған алаңға айналды.

Шарада Жаратылыстану ғылымдарының жоғары мектебі деканының орынбасары Жұмағұл М.Ж. және NatureLab зертханасының ғылыми қызметкері Тұстубаева Ш.Т. жүргізді.

Семинар барысында солтүстік-шығыс Бетпақдаланың негізгі ботаникалық аумақтары, өңір флорасының сирек және эндемик түрлері, соның ішінде Allium lehmannianum Merckl. ex Bunge, реликтті түрлердің қоршаған орта жағдайларына экологиялық бейімделу ерекшеліктері, сондай-ақ солтүстік-шығыс Бетпақдала флорасындағы Rosaceae тұқымдасының түрлік әртүрлілігіне арналған баяндамалар ұсынылды.

Өткізілген ғылыми семинар ведомствоаралық ғылыми ынтымақтастықты дамытуға, зерттеу нәтижелерімен алмасуға және білім алушыларды ботаника мен биоалуантүрлілікті 

2025 жылғы 15 желтоқсанда Жаратылыстану ғылымдарының Жоғары мектебінің «Биология» білім беру бағдарламасының 2-курс студенті Елшібек Аружан Елшібекқызы «Bilim-orkenieti» ұйымы ұйымдастырған республикалық «ҮЗДІК ЖАС ҒАЛЫМ» байқауына қатысып, I дәрежелі дипломмен және «ҮЗДІК ЖАС ҒАЛЫМ» статуэткасымен марапатталды.

Марапаттау рәсімі Қазақстан Республикасының Астана қаласында өткен «Адал адам - адал ұрпақ» атты конференция аясында ұйымдастырылды. Аталған конференция жастардың ғылыми ізденісін қолдауға, кәсіби ойлау қабілетін қалыптастыруға және зияткерлік әлеуетін дамытуға бағытталған.

Елшібек Аружанның ғылыми жетекшісі - Жаратылыстану ғылымдарының Жоғары мектебінің аға оқытушысы Маханова Наргиза Асқарқызы.

Біз студенттеріміздің жетістігін мақтан тұтамыз және алдағы ғылыми жолында сәттілік тілейміз!

2025 жылғы 18 желтоқсанда Қазан федералдық университетінің Психология және білім беру институтында «Ниғматов оқулары. Гуманистік тәрбие: дәстүрлер, инновациялар және болашақ бағдарлар» тақырыбында VII Халықаралық ғылыми-практикалық конференция өтті.

Конференция гуманистік педагогиканың өзекті мәселелерін, рухани-адамгершілік құндылықтарды және қазіргі заман жағдайында тұлға қалыптастырудағы білімнің рөлін талқылау үшін Ресей және шетелдік ғалымдарды, педагогтарды және білім беру саласының практиктерін біріктірді.

Конференция аясында онлайн форматта «Орталық Азия ағартушыларының гуманистік идеялары - білім берудің аксиологиялық ресурсы ретінде» тақырыбында баяндама жасалды. Баяндамашылар - Астана халықаралық университетінің профессоры, педагогика ғылымдарының докторы Баубекова З.Д. және 4 курс студенті Сүлеймен Сания. Ұстаз бен студенттің бірлескен баяндамасы білім берудегі ұрпақтар сабақтастығы мен диалог идеясын айқын көрсетті.

Конференция соңында қатысушылар көрнекті ағартушы Махмудқожа Бехбудидің мұрасына назар аударды. Оның «Ең үлкен байлық - білім. Ең үлкен мұра - тәрбие» деген сөзі конференцияның идеялық өзегіне айналып, бүгінгі педагогикалық қауым үшін өзектілігін сақтап отырғанын көрсетті.

Astana International University-дің үшінші курс студенті Айдана Саханова Ресей Федерациясы Үкіметі жанындағы Заңнама және салыстырмалы құқықтану институты ұйымдастырған Қоғамдық қаржыны құқықтық қамтамасыз ету мәселелері бойынша V Халықаралық эссе байқауында жүлделі орын иеленді.

Аталған беделді зияткерлік сайысқа Ресейдің және шетелдің жетекші білім беру орталықтарынан келген студенттер мен магистранттар қатысты. Байқау географиясы Мәскеу, Санкт-Петербург, Нижний Новгород, Владимир қалаларын, сондай-ақ Қазақстан, Беларусь және Қытай елдерін қамтыды. Конкурсқа ең көп жұмыс М.В. Ломоносов атындағы Мәскеу мемлекеттік университеті, РФ Үкіметі жанындағы Қаржы университеті, Н.И. Лобачевский атындағы Ұлттық зерттеу Нижний Новгород мемлекеттік университеті, Санкт-Петербург мемлекеттік университеті, Ресей мемлекеттік әділет университеті және өзге де жетекші жоғары оқу орындарының студенттері тарапынан ұсынылды.

Байқау қорытындысы бойынша Айдана Саханова «Қаржылық қауіпсіздікті құқықтық қамтамасыз ету» секциясында II орынға ие болды. Қазылар алқасы оның «Қаржылық қауіпсіздік: Қазақстан мен Ресей тәжірибесі» тақырыбындағы эссесін жоғары бағалап, онда екі елдің қоғамдық қаржылардың тұрақтылығын қамтамасыз етуге бағытталған тәсілдеріне салыстырмалы талдау жасалғанын атап өтті.

Ғылыми жетекші ретінде  Astana International University құқық жоғары мектебінің аға оқытушысы Жанат Сеилханов жетекшілік етті. Байқаудағы бұл жетістік университет студенттерінің жүйелі ғылыми дайындығы мен халықаралық академиялық бастамаларға белсенді қатысуының нәтижесі болып табылады.

Astana International University студенттерінің халықаралық байқауларға қатысуы мен жеңістері болашақ мамандардың жоғары деңгейде даярланып жатқанын дәлелдеп, қазақстандық білім берудің халықаралық академиялық кеңістіктегі беделін арттыра түсуде.

Astana International University базасындағы BLCU Kazakhstan филиалының Foundation бағдарламасы бойынша білім алатын 50 студенттен құралған делегация Қытай Халық Республикасына қысқы тілдік тағылымдамадан өту үшін аттанды. Олар Пекин тіл және мәдениет университетінің (BLCU) Хайнань кампусында 15-30 желтоқсан аралығында білімдерін жетілдіруде.

Тағылымдама студенттердің академиялық дайындығының маңызды бөлігі саналады. Бағдарлама аясында қатысушылар қытай тілін терең меңгеріп, елдің мәдениеті мен дәстүрлерімен жақын танысады, сондай-ақ Қытайдағы жетекші лингвистикалық жоғары оқу орындарының біріндегі оқу үдерісінің ерекшеліктерін зерделейді.

Қытайға келген студенттерді Пекин тіл және мәдениет университетінің директоры Ю мырза жылы қарсы алды. Ол өз сөзінде Қазақстан мен Қытай арасындағы білім беру саласындағы ынтымақтастықтың маңызын атап өтіп, BLCU университетінің Қазақстанмен тарихи байланысына тоқталды. Атап айтқанда, Қазақстан Республикасының Президенті Қасым-Жомарт Тоқаевтың осы университетте шамамен 40 жыл бұрын білім алғанын еске салды.

Сабақтарды қытай тілін шет тілі ретінде оқытуда мол тәжірибесі бар BLCU-дің білікті оқытушылары жүргізуде. Бұл студенттерге жоғары академиялық деңгейде білім алуға мүмкіндік береді.

Айта кету керек, аталған тілдік тағылымдама қытай тарапының толық қолдауымен ұйымдастырылып отыр. Студенттерге қолайлы оқу және тұру жағдайлары жасалған. Тек әуе қатынасына байланысты шығындар ғана студенттердің өз есебінен төленеді.

Хайнаньда өтіп жатқан қысқы тағылымдама - жастардың кәсіби және тілдік әлеуетін арттырумен қатар, Қазақстан мен Қытай арасындағы достық байланыстарды нығайтуға бағытталған маңызды қадам.

2025 жылғы 11 желтоқсанда «Халықаралық құқық» білім беру бағдарламасының 25А тобының студенттері үшін Психологиялық қызметтің ұйымдастыруымен «Эмоцияларды басқару және эмоционалды интеллект: өзін-өзі тану, өзін-өзі реттеу әдістері және олардың практикалық қолданылуы» тақырыбында интерактивті дәріс өткізілді.

Іс-шараның негізгі мақсаты емтихандар алдындағы психоэмоционалдық күйді тұрақтандыру, студенттердің эмоционалды интеллектін дамыту және психологиялық сауаттылығын арттыру болды. Дәріс барысында эмоциялардың пайда болу табиғаты, стресс пен мазасыздықтың психофизиологиялық ерекшеліктері, сондай-ақ эмоционалды интеллекттің негізгі компоненттері жөнінде теориялық мәліметтер ұсынылды.

Сонымен қатар студенттер эмоцияларды басқару тәсілдері мен өзін-өзі реттеу дағдыларын тәжірибе жүзінде меңгеріп, эмоционалды күйді тиімді басқаруға арналған практикалық құралдармен танысты. Интерактивті форматта өткен дәріс барысында қатысушылар өз ой-пікірлерін ортаға салып, мамандарға сұрақ қою мүмкіндігіне ие болды.

Мұндай профилактикалық шаралар студенттердің емтихан кезеңін сенімді әрі сабырлы өткізуіне оң ықпал ететіні сөзсіз.

Астана халықаралық университеті Құқық жоғары мектебінің декан орынбасары Сейілханов Жанат Дүйсенбайұлы Қазақстан Республикасы Бас прокуратурасы жанындағы Құқық қорғау органдары академиясының медалімен марапатталды.

Аталған жоғары марапат көпжылдық нәтижелі ынтымақтастығы, ғылым мен білім беруді дамытуға қосқан елеулі үлесі, сондай-ақ еліміздің білім беру және құқық қорғау органдары арасындағы өзара іс-қимылды нығайтуға сіңірген еңбегі үшін табысталды.

Жанат Дүйсенбайұлы ұзақ жылдар бойы құқық саласына білікті мамандар даярлау ісіне белсене араласып келеді. Ол заң білімін жетілдіруге, ғылыми зерттеулерді дамытуға сүбелі үлес қосып, теория мен практиканы ұштастыруға ерекше мән беріп келеді. Сонымен қатар жоғары оқу орындары мен құқық қорғау құрылымдары арасындағы әріптестікті кеңейту бағытында жүйелі жұмыс жүргізіп келеді.

Астана халықаралық университеті Құқық жоғары мектебі мен Қазақстан Республикасы Бас прокуратурасы жанындағы Құқық қорғау органдары академиясы арасындағы ынтымақтастық тәжірибеге негізделген, заманауи заңгер мамандарды даярлауға бағытталған құқықтық білім беру жүйесін қалыптастыруда маңызды рөл атқарады.

Бұл марапат Жанат Сейілхановтың кәсіби еңбегіне берілген жоғары баға әрі еліміздегі құқықтық ғылым мен білім беру саласын дамытуға қосқан үлесінің жоғары бағаланғанын айқындайды.