Жаңалықтар

2025 жылғы 30-31 қазанда Ташкент қаласында Өзбекстан Республикасының Ғылым академиясы Ботаника институты жанындағы ғылыми дәрежелер беру құқығына ие Ғылыми кеңестің отырысы өтті. Ғылыми кеңес отырысына  биология ғылымдарының докторы, профессор, Astana International University-дің Бірінші вице-президенті Анар Базарқызы Мырзагалиева қатысты.

Отырыста Абдураимов Озодбек Султанқұловичтің «Өзбекстан флорасындағы мәдени өсімдіктердің жабайы туыстары: таралуы, популяциясының жағдайы және табиғи ресурстары» атты диссертациялық жұмысы 03.00.05 Ботаника мамандығы бойынша биология ғылымдарының докторы ғылыми дәрежесіналу үшін қорғалды.

Анар Базарқызы Мырзғалиева аталған диссертация бойынша ресми оппонент ретінде бекітіліп, жұмыстың өзектілігіне, ғылыми жаңалығына, теориялық және практикалық маңызына жан-жақты баға берілген ресми пікірін ұсынды.

А.Б. Мырзғалиеваның Ғылыми кеңес отырысына қатысуы Қазақстан мен Өзбекстан арасындағы ғылыми байланыстарды нығайтуға, сондай-ақ Орталық Азия өсімдік әртүрлілігін зерттеу мен сақтау саласындағы тәжірибе алмасуға ықпал етті.

2025 жылдың 30 қазанында Астана халықаралық университетінің Педагогикалық институты «Биология» білім беру бағдарламасының даму жоспарына сәйкес «Оқу мен оқытудағы бағалаудың рөлі» тақырыбында шеберлік сабағын өткізді. Іс-шараның мақсаты - педагогикалық тәжірибеден өтетін жоғары курс студенттерінің кәсіби құзыреттіліктерін қалыптастыру болды.

          Өзінің білімі мен сабақ жоспарларын құрастырудағы практикалық тәжірибесімен №70 мектеп-гимназиясының шебер-ұстазы, «Жылдың үздік педагогы – 2016» атағының иегері және Ы.Алтынсарин медалінің иегері Сағатбекова Серікқайша Қабылғазынқызы бөлісті.

          Болашақ мұғалімдер қалыптастырушы бағалаудың 10 балдық шкаласының ерекшеліктерімен танысып, тапсырмалар орындады, ал өзара және өзін-өзі бағалау құралдарын пайдалана отырып, критерийлер мен дескрипторларға сүйеніп, бір-біріне кері байланыс берді. Осы арқылы олар оқушылардың жетістіктерін бағалау және қысқамерзімді сабақ жоспарын құрастыру дағдыларын шыңдады. Сонымен қатар, қатысушылар өздерінің бағалау тәжірибесін терең талдаудан өткізе білді.

          Іс-шара студенттеріміздің педагогикалық шеберлігін арттыруға ықпал етті. Бұған шебер-ұстаз құрған орта мен барлық қатысушылардың жоғары деңгейдегі кері байланысы дәлел болды.

          Серікқайша Қабылғазынқызына шынайы алғысымызды білдіреміз және алдағы уақытта әдістемелік ынтымақтастығымыздың табысты жалғасатынына сенім білдіреміз!

    2025 жылғы 1 қарашада Бейжің тіл және мәдениет университетінің (Beijing Language and Culture University, BLCU) президенті Дуань Пэн Astana International University (AIU) базасында ашылған BLCU филиалына ресми сапармен келді.

    Іс-шараға AIU басшылығы, BLCU-дің Қазақстандағы өкілдері, оқытушылар мен студенттер қатысты.

  AIU президенті Серік Ирсалиев мәртебелі мейманға оқу аудиторияларын таныстырып, университеттің білім беру және ғылыми қызметі, сондай-ақ студенттер үшін қолайлы инфрақұрылым қалыптастыру бағытындағы жоспарлар жөнінде баяндады.

  Сапар барысында Дуань Пэн профессор-оқытушылар құрамымен және студенттермен кездесіп, екі ел арасындағы достық байланыстар мен мәдени өзара түсіністікті дамытудағы тілдік білімнің маңыздылығын атап өтті.

     Тараптар білім беру саласындағы ынтымақтастықты одан әрі нығайту, қытай тілі мамандарын бірлесіп даярлау және қос дипломды бағдарламаларды жүзеге асыру мәселелерін талқылады.

     AIU мен BLCU арасындағы серіктестік студенттерге жоғары сапалы білім алуға, тілдік және мәдени құзыреттерін жетілдіруге, сондай-ақ халықаралық ғылыми жобаларға қатысуға мүмкіндік береді.

    Бірлескен жобалардың табысты жүзеге асуы Қазақстан мен Қытай арасындағы мәдени және білім беру байланыстарын нығайтып, академиялық, саяси және экономикалық ынтымақтастықты кеңейтуге серпін береді деп күтілуде.

Форумда үздік шетелдік университеттердің жетекшілері, халықаралық рейтинг және аккредиттеу агенттіктерінің өкілдері бас қосуда. Атап айтқанда, Бейжің тіл және мәдениет университеті, Кардифф университеті, Вусонг университеті, МИФИ, Минерва университеті және басқа да жетекші жоғары оқу орындары.

Astana International University  форумға белсенді қатысып, UIBE қос дипломдық бағдарламасының Халықаралық бизнес білім беру бағдарламасының   3-курс студенті Баклага Маргарита белсенділік танытты.

Форумда Президент шетелдік студенттермен еркін пікір алмасып, Қазақстанда білім алып жатқан жастардың тәжірибесін тыңдап, олардың таңдаған жолына сәттілік тіледі.

Қазіргі таңда Қазақстанда 31 мыңнан астам шетелдік студент білім алуда. Мемлекет басшысы бұл көрсеткішті 2029 жылға қарай 100 мыңға дейін өсіру міндетін қойды. Бұл бастама еліміздің халықаралық білім беру  жолындағы жаңа серпінді қадам болмақ.

2025 жылғы 30 қазанда Astana International University (AIU) және бұлтты есептеулер мен үлкен деректер саласындағы әлемдік жетекші компаниялардың бірі - Inspur Group арасында кездесу өтті.

Анықтама үшін: Inspur Group үш жария компанияны біріктіреді және бұлттық технологиялар, жасанды интеллект және цифрлық трансформация салаларында жетекші жобаларды жүзеге асырады. Компания Қытай, Сауд Арабиясы, Малайзия, Бразилия және Еуропа елдерінде ауқымды цифрлық бастамаларды табысты іске асырып, 350 миллионнан астам пайдаланушыға қызмет көрсетеді.

Кездесу барысында қытайлық компания Орталық Азия жоғары оқу орындарымен ынтымақтастықты кеңейту жөніндегі бастамасын таныстырды. Тараптар Қазақстанда жасанды интеллект бойынша жоғары білікті мамандар даярлауға, ғылыми зерттеулерді дамытуға және инновациялық технологиялық шешімдерді енгізуге бағытталған кешенді экожүйе қалыптастыру перспективаларын талқылады.

Ынтымақтастықтың негізгі бағыттары:

• жасанды интеллект саласындағы бірлескен білім беру бағдарламаларын іске қосу;
• AIU базасында зертханалар мен ғылыми-зерттеу орталықтарын құру;
• NLP, компьютерлік көру, ірі модельдер және басқа да салалар бойынша ғылыми жобаларды жүзеге асыру;
• технологияларды көрсету алаңын қалыптастыру үшін AIU кампусы инфрақұрылымына AI шешімдерін енгізу керектігін атап өтті.

Astana International University (AIU) жанындағы NatureLaB ғылыми-зерттеу зертханасының гербарийі халықаралық Index Herbariorum базасына ресми түрде енгізіліп, бірегей AIU акронимімен тіркелді. Бұл ақпарат Нью-Йорк ботаникалық бағы (New York Botanical Garden) қолдайтын жаһандық ботаникалық коллекциялар дерекқорында жарияланды.

Акронимнің берілуі AIU гербарийінің өсімдік үлгілерін халықаралық стандарттарға сай жинайтын, жіктейтін және каталогтайтын дербес ғылыми сақтау орны ретінде мойындалғанын білдіреді.

NatureLaB AIU зертханасы Қазақстан өсімдіктері әлемін зерттеуге, биоалуантүрлілікті сақтауға, сондай-ақ өсімдіктер биологиясы саласындағы іргелі және қолданбалы зерттеулерді дамытуға бағытталған.

Зертхананың негізгі қызмет бағыттары:
• өсімдік биологиясы саласында отандық және шетелдік ғалымдардың қатысуымен іргелі және қолданбалы зерттеулер жүргізу;
• бакалавриат, магистратура және PhD деңгейіндегі жоғары білікті кадрларды даярлауға қатысу, студенттер, постдокторанттар және оқытушылардың зерттеу дағдыларын дамыту;
• салалық ұйымдармен және зерттеу орталықтарымен ғылыми ынтымақтастықты кеңейту;
• ғылыми нәтижелерді талқылау және апробациялау мақсатында халықаралық конференциялар, форумдар және дөңгелек үстелдер ұйымдастыру;
• сыртқы ұйымдардың тапсырысы бойынша ғылыми зерттеулер жүргізу және өсімдік материалдарын жинау.

AIU гербарийінің Index Herbariorum базасына тіркелуі университеттің халықаралық ғылыми ортадағы позициясын күшейтіп, ботаника, экология және табиғи мұраны сақтау саласында ынтымақтастықты дамытуға ықпал етеді. Жаһандық каталогқа енгізілуі коллекцияны әлем зерттеушілері үшін қолжетімді етеді, бұл ғылыми алмасуды нығайтып, флораны зерттеу жөніндегі жаһандық бастамаларды қолдауға мүмкіндік береді.

Astana International University гербарий қорын толықтыруды, инновациялық зерттеу әдістерін енгізуді және Қазақстанның өсімдік биоалуантүрлілігі туралы білімді ілгерілетуді жалғастырады.

22–25 қазан аралығында Астана қаласы әкімдігі мен Суретшілер одағы ұйымдастырған «ӨзЖерім: Urban Nomads» республикалық симпозиумы ÓzgeEpic Creative Hub арт-кеңістігінде өтті. Іс-шараға «Графикалық дизайн», «WEB-дизайн», «Аударма ісі» білім беру бағдарламаларының 2-курс студенттері мен «Дизайн» мамандығының 1-курс магистранттары қатысты.

Симпозиум бағдарламасына Қазақстанның сегіз аймағынан келген жиырма суретшінің шығармашылық сессиялары, дәрістері мен шеберлік сабақтары енді. Қатысушылар урбанизм, тұлғалық бірегейлік және кеңістікті түрлендіру тақырыптарын зерттеді.

Студенттер мен магистранттар Қазақстан Республикасының Ұлттық музейінде болып, ҚР еңбек сіңірген қайраткері, Мемлекеттік сыйлықтың лауреаты Ерболат Төлепбайдың көрмесіне арналған экскурсияға қатысты. Экскурсияны еліміздің танымал өнертанушысы, Қазақстанның еңбек сіңірген қайраткері Камилла Витальевна Ли жүргізді.

Симпозиумның қорытындысы ретінде 40 жұмыс пен бір үлкен эксперименттік кенептен тұратын көрме өтті.
Сонымен қатар, «WEB-дизайн» және «Архитектуралық дизайн» мамандығының студенттері ÓzgeEpic Creative Hub кеңістігін өз бетімен аралап, қазақстандық заманауи өнердің жаңа үрдістерімен танысты. Аға профессор Т.А. Киселева, доцент Г.Н. Поваляшко

2023-2025 жылдарға арналған Қазақстан Республикасы Ғылым және жоғары білім министрлігінің гранттық қаржыландыруы аясында жүзеге асырылып жатқан АР19678852 «Университеттің академиялық дербестігі жағдайында „Педагогикалық ғылымдар“ бағыты студенттері мен түлектерінде үздіксіз кәсіби даму (ҮКД) құзыреттерін қалыптастыру» ғылыми жобасы шеңберінде М. Қозыбаев атындағы Солтүстік Қазақстан университеті базасында Workshop-форум өтті.

Іс-шараға Астана халықаралық университетінің оқытушылары - профессор Баубекова Г.Д. және Власова Н.В. белсенді қатысты.

Форум барысында болашақ педагогтардың құзыреттерін дамыту бағыттары, үздіксіз кәсіби өсу тетіктері, өзін-өзі дамыту және академиялық дербестік мәселелері талқыланды.

AIU өкілдерінің қатысуы педагогикалық әлеуетті дамытуға бағытталған ғылыми-тәжірибелік тәсілдерді жетілдіруге, тәжірибе алмасуға және жоғары оқу орындары арасындағы ынтымақтастықты нығайтуға мүмкіндік берді.

2025 жылдың 20 қазанынан 22 қарашасына дейін Экономика жоғары мектебінің докторанттары — Батай Мария (БББ 8D04104 «Менеджмент») және Мұқанова Ардақ (БББ 8D04101 «Өнеркәсіп экономикасы») Ресей Федерациясының Томск қаласындағы мемлекеттік университетінде ғылыми тағылымдамадан өтуде.

Ғылыми тағылымдаманың мақсаты – ғылыми құзыреттерді тереңдету, академиялық көкжиекті кеңейту және зерттеу дағдыларын дамыту. Тағылымдама барысында докторанттар өздерінің диссертациялық зерттеулерімен айналысып, ғалымдармен тәжірибе алмасады және ғылыми талдау мен деректерді өңдеудің заманауи әдістерін меңгереді. Сонымен қатар, тағылымдаманың маңызды міндеттерінің бірі – университеттер арасындағы ғылыми ынтымақтастықты нығайту және ғылыми кадрларды даярлау сапасын арттыру болып табылады.

Бүгін Астана халықаралық университетінің Президенті Ирсалиев Серік Азтайұлы 25 қазан - Республика күніне орай ҚР Мәдениет және ақпарат министрі Аида Ғалымқызы Балаеваның бұйрығымен Өнер және гуманитарлық ғылымдар жоғары мектебі деканның орынбасары Дауменова Элла Талгатовна және   архитектура кандидаты, қауымдастырылған професссор Киселева Татьяна Александровнаны «ҚР Мәдениет саласының үздігі»  төсбелгісімен марапаттады. 

Aстана халықаралық университеті марапат иелерін шын жүректен құттықтайды. Сіздердің кәсіби біліктіліктеріңіз бен еңбектеріңіз ел мәдениеті мен білім беру саласының дамуына зор үлес қосып келеді. Алдағы уақытта да шығармашылық ізденістеріңіз бен ғылыми еңбектеріңіз табысты болып, жаңа жетістіктер мен биік белестерге жете берулеріңізге тілектеспіз!

2025 жылғы 21–22 қазан күндері Алматы қаласындағы Қазақ мал шаруашылығы және жемшөп өндірісі ғылыми-зерттеу институтында TechPrime компаниясы мен Oxford Nanopore Technologies бірлесіп ұйымдастырған «From Sample to Sequence: Discover the Power of Oxford Nanopore Technologies» атты тәжірибелік конференция өтті.

Іс-шараға Астана халықаралық университетінің PhD докторы, қауымдастырылған профессоры Айдын Оразов Ерғалиұлы қатысты.

Конференция қатысушылары нанопоралық секвенирлеудің заманауи технологияларымен, adaptive sampling әдісімен, сондай-ақ өсімдіктер, жануарлар және микробтық қауымдастықтардың геномдарын зерттеу тәсілдерімен танысты. Ерекше назар PromethION сериясындағы құрылғылармен жұмыс істеуге және EPI2ME (Bioinformatics) платформасында деректерді талдау бойынша өткізілген тәжірибелік шеберлік сабақтарына аударылды.Сонымен қатар, іс-шара барысында GenDx, Omixon және Asuragen компанияларының HLA-типтеу мен тұқым қуалайтын ауруларды генетикалық тестілеуге арналған шешімдері таныстырылды.

Бұл конференция биологиялық және ауыл шаруашылық зерттеулерінде нанопоралық технологияларды қолданудың болашағын талқылауға және тәжірибе алмасуға арналған тамаша алаң болды.

Айдын Оразов Ерғалиұлы TechPrime компаниясына шақырғаны және іс-шараны жоғары деңгейде ұйымдастырғаны үшін алғысын білдірді.